SAMÞYKKT Á STOFNFUNDI 14.04.1988 MEÐ SÍÐARI TÍMA BREYTINGUM

NAFN OG TILGANGUR

1. gr. Nafn félagsins er Kælitæknifélag Íslands. Félagið er stofnað 14. apríl 1988 og aðsetur þess er í Reykjavík.

2. gr. Tilgangur félagsins er að auka þekkingu á sviði kælitækni og miðla reynslu og auka samvinnu þeirra sem vinna við kælitækni.

1. Markmiðum þessum hyggst félagið ná m.a. á eftirfarandi hátt:
2. Skipuleggja fyrirlestra, umræðufundi, skoðunarferðir og námskeið.
3. Stuðla að aukinni og bættri kennslu og rannsóknum á sviði kælitækni.
4. Vinna að gerð reglugerða og staðla í samvinnu við aðra fyrir kæliiðnaðinn og stuðla að tæknilegum framförum.
5. Taka þátt í alþjóðasamstarfi á sviði kælitækni og miðla upplýsingum um nýjungar.

FÉLAGATAL OG FÉLAGSGJÖLD

3. gr. Aðalfélagar geta orðið einstaklingar sem áhuga hafa á kæli- eða varmadælutækni, og styrktarfélagar fyrirtæki, stofnanir eða félög. Umsóknir um aðild að félaginu skulu vera skriflegar og sendar stjórn. Úrsögn úr félaginu skal einnig vera skrifleg og sendast stjórn, og miðast við áramót.

4. gr. Stjórn félagsins getur strikað út félaga af félagaskrá sem ekki hafa greitt félagsgjöld í 2 ár að undangenginni skriflegri viðvörun. Auk þess getur stjórn félagsins vikið félaga úr félaginu ef henni þykir efni standa til en borið getur hann mál sitt undir almennan félagsfund.

5. gr. Félagsgjöld skulu standa undir kostnaði við félagið og ákveðin á aðalfundi eftir tillögu frá stjórn. Styrktarfélagar greiði félagsgjöld sem miðast við stærð og umsvif. Námsmönnum og ellilífeyrisþegum gefst möguleiki á að greiða aðeins hálft gjald. Námsmenn framvísi gildu vottorði frá skóla fyrir hvert skólaár.
Gjalddagi félagsgjalda er 1. júní ár hvert. Greiði félagsmaður gjöld sín síðar er stjórninni heimilt að láta hann bera vaxta- og innheimtukostnað.

6. gr. Stofnfélagar verða allir þeir sem skrá sig í félagið fyrir fyrsta aðalfund.

AÐALFUNDUR OG STJÓRN

7. gr. Aðalfundur hefur æðsta vald í málefnum félagsins. Hann skal haldinn fyrir 1. maí ár hvert og skal boða til fundarins skriflega með minnst þriggja vikna fyrirvara. Dagskrá fundarins skal birt í fundarboðinu.

Þessi mál skulu tekin til meðferðar á fundinum.

1. Stjórn félagsins gerir grein fyrir störfum undangengins starfsárs.
2. Lagðir fram endurskoðaðir reikningar félagsins.
3. Kosning stjórnar og tveggja endurskoðenda.
4. Félagsgjöld ákveðin.
5. Önnur mál.

Einfaldur meirihluti þeirra sem mæta á fund ræður úrslitum í málum. Atkvæðisrétt hafa einungis einstaklingar.

8. gr. Stjórnin er kosin á aðalfundi. Hún skal skipuð formanni, varaformanni, ritara, gjaldkera og þremur meðstjórnendum. Formann skal kjósa sérstaklega en aðra stjórnamenn skal kjósa saman og skipta þeir með sér verkum. Auk þess skal kjósa tvo endurskoðendur. Stjórnin er kosin til tveggja ára og á hverjum aðalfundi ganga þrír stjórnarmenn úr stjórn og annað hvert ár er skipt um formann. Endurkosning er aðeins leyfð einu sinni í senn. Eftir fyrsta starfsár skal skipta um þrjá stjórnarmenn og skal hlutkesti ráða.

FAGRÁÐ

9. gr. Fagráð skal skipað af stjórn félagsins til eins árs í senn. Í fagráði skulu sitja minnst 3 menn úr sem flestum greinum kælitækni. Formaður fagráðs skal skipaður af stjórn. Fagráð skal fjalla um afmörkuð tæknileg málefni sem stjórn félagsins felur því og skila áliti til stjórnar.

FRÆÐSLUNEFND

10. gr. Fræðslunefnd skal skipuð af stjórn félagsins til eins árs í senn. Í fræðslunefnd skulu sitja minnst 3 menn. Formaður fræðslunefndar skal skipaður af stjórn. Nefndin skal fjalla um afmörkuð málefni er tengjast menntun og fræðslu, sem stjórn félgsins felur henni og skila áliti til stjórnar.

BREYTING Á LÖGUM

11. gr. Lögum félagsins verður aðeins breytt á aðalfundi þar sem breytingartillögur hafa verið kynntar í fundarboði. Til að lagabreytingar öðlist gildi þarf samþykki tveggja þriðju hluta greiddra atkvæða.

FÉLAGSSLIT

12. gr. Tillaga um að félaginu skuli slitið skal sæta sömu meðferð og breyting á lögum sbr. 11. gr. Félagsfundur tekur ákvörðun um ráðstöfun eigna félagsins.

Upp

Til baka